ചിലവു ചുരുക്കല്‍ മാമാങ്കം!

നല്ല ചുള്ളന്‍ ചെക്കനാണ്. കാണാനും അതെ, സ്വഭാവത്തിലും അതെ. പക്ഷെ ഒരു കുഴപ്പമുണ്ട്. പറയുന്നതും ചെയ്യുന്നതും തമ്മില്‍ ഒരുമാതിരി മോരും മുതിരയും തമ്മിലുള്ള കോമ്പിനേഷന്‍ പോലാണ്. പറഞ്ഞു വരുന്നത് ഇന്ത്യന്‍ യുവത്വത്തിന്റെ ശുഭ പ്രതീക്ഷയായ സാക്ഷാല്‍ ശ്രീമാന്‍ രാഹുല്‍ജിയെ കുറിച്ചു തന്നെയാണ്. വിദ്വാന്‍ അങ്ങ് ഡെല്‍ഹിയില്‍ ഉണ്ടാക്കിയ പുകില്‍ പെറ്റ തള്ള മറന്നാലും ശശിതരൂര്‍ തൊട്ടുള്ള ഒരു കോര്‍പറേറ്റ് മന്ത്രിയും സഹിക്കൂല്ല എന്നത് നൂറ് തരം! ഒരുകാര്യവും ഇല്ലാതെ അടങ്ങിയിരുന്ന ശശിസാറിനെക്കൊണ്ട് കാലിത്തൊഴുത്തെന്ന് പ്രയോഗിപ്പിച്ചത് ഈ വിദ്വാന്റെ തലയില്‍ ഉദിച്ച പ്രായോഗിക രാഷ്ട്രീയ ബുദ്ധിയുടെ സൈഡ് ഇഫക്റ്റല്ലായിരുന്നോ? പ്രണബ്സാറിന് പരിചയവും ഇരുത്തവും ഉള്ള സ്ഥിതിക്ക് ഇത്തിരികൂടെ ആലോചിച്ച് ചിലവ് ചുരുക്കല്‍ ചീന ചട്ടിയില്‍ കൈവച്ചാല്‍ മതിയായിരുന്നു. അമ്പലം വിഴുങ്ങികളായ താപ്പാനകള്‍ ചുറ്റിലും ഇരിക്കുമ്പോള്‍ ഇമ്മാതിരി തലതിരിഞ്ഞ ഏര്‍പ്പാടുകളൊന്നും ശരിയാവില്ല സാറേ! ഒരു നല്ലകാര്യവും ചെയ്യാന്‍ സമ്മതിക്കില്ല ഈ വര്‍ഗ്ഗം!

ആരെതിര്‍ത്താലും ഇല്ലെങ്കിലും ചിലവു ചുരുക്കല്‍ ഏര്‍പ്പാട് പൊതുജനത്തിന് ശ്ശി ബോധിച്ചു എന്നതാണ് സത്യം! പക്ഷെ ഇതു മറ്റൊരു ധൂര്‍ത്തിനു മുമ്പേയുള്ള സാമ്പിള്‍ വെടിക്കെട്ടാണെന്ന് ആരെങ്കിലും അറിഞ്ഞൊ? സോണിയാ ജി കന്നുകാലി വണ്ടിയില്‍ പോയത് കൊണ്ട് ഇന്ത്യാമഹാരാജ്യത്തിനുണ്ടായ ചിലവ് നമ്മള്‍ സഹിച്ചേ മതിയാവൂ. ലോകത്തിലെ ഏറ്റവും ശക്തയായ വനിതകളുടെ കൂട്ടത്തില്‍ സ്ഥാനം പിടിച്ചവര്‍ക്കുള്ള പൊതു ജനത്തിന്റെ പാരിദോഷികം ആവട്ടെ അത്. പക്ഷെ ഈ പയ്യന്‍സും ഇങ്ങിനെ തുടങ്ങിയാല്‍...ഇനി ഇതിന്റെ ചുവടു വച്ച സര്‍വ്വ മന്ത്രി-തന്ത്രി-പരിചാരക വൃന്തങ്ങളും തുനിഞ്ഞിറങ്ങിയാല്‍ പൊതു ജനം ക്ലച്ചുപോയ വണ്ടിപോലെ പെരുവഴിയില്‍ കിടന്നുപോകുമേ സാറന്മാരേ.

മുല്ലപ്പള്ളി സാറിനും രവി സാറിനും എന്നും ഒരേ പരാതിയേ ഉള്ളൂ..കേരളം എന്നും കേന്ദ്രത്തോട് നന്ദികേട് മാത്രമേ കാണിക്കുന്നുള്ളൂ. എത്ര പറഞ്ഞാലും മനസ്സിലാവില്ല ഇവിടത്തെ ഇടതന്മാര്‍ക്ക്. മണിയടിച്ചു നിന്ന പലരും പലതും നേടി. കേരളം ഇപ്പോഴും കൊലവിളി മാത്രമേ നടത്തുന്നുള്ളൂ..അനുസരണ എന്നൊന്ന് തൊട്ട് തെറിച്ചിട്ടില്ല. ആസിയാന്‍ ആയാലും, വല്ലാര്‍പ്പാടം ആയാലും, പുതിയ എന്ത് കുരിശിറക്കിയാലും എതിര്‍ക്കും എന്നിട്ട് ചങ്ങലകെട്ടിയും മതിലു പണിതും പേടിപ്പിക്കാന്‍ നോക്കും! രാഹുല്‍ സാറ് പോക്കറ്റില്‍ നിന്ന് നയാപൈസ ചിലവാക്കാതെ (അങ്ങനെയെങ്കിലും ചിലവു ചുരുക്കലിനെ ഒന്നു മോടിപിടിപ്പിച്ചെടുക്കാം)കേരളത്തില്‍ ലാന്റ് ചെയ്തു. വന്നതു നല്ല കിടു വിമാനത്തില്‍, കേരളത്തിലെ സെറ്റപ്പൊന്നും തീരെ പിടിക്കാത്തത് കൊണ്ട് വരുമ്പോ ഒരു കാറും കൂടെ കൊണ്ടു പോന്നു. ഒരു ദുരന്തമുണ്ടായപ്പോ കേരള മുഖ്യന്‍ നെഞ്ചിലടിച്ചു വിളിച്ചു പറഞ്ഞിട്ടും ആന്റ്ണിസാര്‍ അനങ്ങിയോ? അങ്ങനെ കണ്ട അണ്ടനും അടകോടന്റെം ചവം പേറാനുള്ളതല്ല എന്റെ വിമാനങ്ങള്‍ എന്ന് പതിവ് ശൈലിയില്‍ വളച്ചൊടിച്ച് പറഞ്ഞില്ലേ. ഇങ്ങിനെ വേണം ! പറയാനുള്ളത് ഏത് മുഖ്യനോടും പറഞ്ഞേക്കണം. രാഹുല്‍ജിയുടെ കാമ്പസ് പര്യടനത്തിന് വെറും രണ്ടു കോടി മാത്രമേ ചിലവായുള്ളൂ. കേരളം കേന്ദ്രത്തോട് ഇനിയും നന്ദികേട് കാട്ടരുത്. ഭാവിയില്‍ ഇന്ത്യയെ നയിക്കേണ്ടവരെ തേടിയുള്ള യാത്രയിലാണ് രാഹുല്‍. അതിനേക്കാള്‍ വലുതാണോ ചത്തു മണ്ണടിഞ്ഞ കുറേ ഇരുകാലികള്‍! മാധ്യമപ്പട കോള്‍മയിര്‍ക്കൊള്ളട്ടേ...ബോട്ട് മുക്കിയത് ഇടത് മന്ത്രിസഭയാണെന്നും എഴുതട്ടേ...എന്നാലും കേന്ദ്രന്മാരുടെ ഇമ്മാതിരി തരംതാണ വേലകള്‍ക്ക് ചൂട്ടു പിടിക്കുന്നത് നിര്‍ത്തരുത്!

മക്കള് ചൊറിഞ്ഞോണ്ടിരി!

കേന്ദ്രന്മാര്‍ വേന്ദ്രന്മാരാണെന്ന് അടിക്കടി തെളിയിച്ചോണ്ടിരിക്കുവാണ്. കെ.പി.സി.സി കുഞ്ഞാ‍ടുകളുടെ ഡയലോഗ് പ്രകാരം, 3 സംസ്ഥാനങ്ങളില്‍ തികച്ചില്ലാത്ത ക.മാ.പ (കമ്യൂണിസ്റ്റ് മാര്‍ക്സിസ്റ്റ് പാര്‍ട്ടി) എന്തുലത്തിയാലും ഇവിടെ ഒരു ചുക്കും സംഭവിക്കില്ല എന്നൊക്കെയാണ്. പക്ഷെ കഴിഞ്ഞ കുറച്ചു നാളുകളായി കേരളത്തിലെ പത്രങ്ങളായ പത്രങ്ങളിലൊക്കെ ഒന്നൊന്നര വലുപ്പത്തിലല്ലേ പരസ്യം, മലയാള രാജ്യത്തിലെ എഴുത്തും വായനയും അറിയുന്ന എല്ലാവരും അത് വായിച്ചു രസിച്ചു.എന്നിട്ട് തീരുമാനത്തിലുമെത്തി ആസിയാന്‍കരാര്‍ പോലൊരെണ്ണം സ്നേഹത്തോടെ തന്ന കോഗ്രസ് അണ്ണന്മാര്‍ തന്നെ സത്യം!അതു മാത്രമാണ് സത്യം! പരസ്യത്തിന്റെ ഉദ്ദേശ ശുദ്ധിയെ മാര്‍ക്സിസ്റ്റ് പാര്‍ട്ടി അല്ലാതെ വേറെ ആരും കുറ്റം പറയുകയുമില്ല! കുറേ നാളായി തങ്ങള്‍ക്ക് വേണ്ടി സര്‍ക്കസ് കളിക്കുന്ന മാധ്യമ പുംഗവന്മാര്‍ക്ക് കെ.പി.സി.സി അറിഞ്ഞ് നല്‍കിയ വഴിപാടാണീ പരസ്യ പ്രളയം എന്നൊക്കെ അസൂയലാക്കള്‍ പറഞ്ഞേക്കാം...പാര്‍ട്ടിപത്രം പരസ്യത്തിന്റെ സോഴ്സ് ഫയല്‍ അറബിക്കടലിലോട്ട് വലിച്ചെറിഞ്ഞെന്നൊക്കെയാണ് കേട്ടത്! രമേശും, സഹമന്ത്രിപ്പണി ഇപ്പൊ സഹികെട്ട വിഴുപ്പലക്കലാണെന്ന് തെളിയിച്ചോണ്ടിരിക്കുന്ന മുല്ലപ്പള്ളീ സാറും ഇളകരുത്. ഒരു പാലമിട്ടാല്‍ അങ്ങോട്ടും ഇങ്ങോട്ടും വേണ്ടേ...ആരെങ്കിലും വല്ലതും ചോദിച്ചു പോയാല്‍..ഫാ പുല്ലേ...കോടികള്‍കൊണ്ടമ്മാനമാടുന്ന സഹമന്ത്രിമാരും, ട്വിറ്റര്‍ ശശിമാരും ഭരിക്കുന്ന ഡെല്‍ഹിയെ നിനക്കറിയില്ലേ..ഉണ്ടചോറിന് നന്ദികാണിക്കാത്ത ഇടതന്മാരെ പോലാണോ കോഗ്രസ്കാരനെന്നൊരു കാച്ചും കാച്ചിയേക്കണം വെടിപ്പായിട്ട്!

സി.പി.എമ്മിന്റെ മതിലിന്റെ ദ്വാരം അളക്കാന്‍ ടേപ്പുമായി പോയ ചില ചേട്ടന്മാരൊക്കെ ആകെ ടെന്‍ഷന്‍ അടിച്ച് ഏത് പരുവത്തിലാണ് വാര്‍ത്തകളൊക്കെ കൊടുത്തത് എന്ന് ജനം കണ്‍കുളിര്‍ക്കെ കണ്ടു.കളവെഴുതുമ്പോഴും ഒരിത്തിരി സത്യം ഇടയ്കൊക്കെ വന്നു പോയത് കൊണ്ട് മാത്രം നാട്ടുകാര്‍ ഒതുങ്ങിയിരുന്നെന്ന് ആശ്വസിച്ചാല്‍ നന്ന്. എന്തൊക്കെയായിരുന്നു ബഹളം...150 രൂപയും ബിരിയാണീം.. ഇതാണത്രേ ഇക്കുറി സി.പി.എം കൊടുത്ത ഓഫര്‍. ചങ്ങലയില്‍ കണ്ണിയായാലുള്ള കൂലിയാണാത്രേ!ഓഫര്‍ കനത്തതായതു കൊണ്ട് ചങ്ങല മതിലായി.. ഇനി നാളെ ഇതൊക്കെ ചിലവഴിച്ചതിന്റെ സോഴ്സ് നോക്കി പോയിട്ട്..അതും ലാവലിന്റെ കണക്കില്‍ പിണറായി സഖാവിന്റെ ചങ്കിലോട്ട് തന്നെ വച്ചു കെട്ടാന്‍ ഒന്നു ട്രൈ പണ്ണറേന്‍!.

എന്തായാലും ചങ്ങല ഗംഭീരമായെന്ന് പല മാധ്യമങ്ങളുടെയും ഏനക്കേടില്‍ നിന്നും തന്നെ നാട്ടുകാര്‍ക്ക് മനസ്സിലായി.ഇതിനിടെ ചങ്ക് പിടച്ചുപോയെ ഒരു സംഭവം വേറെയുമുണ്ടായി.നമ്മുടെ സെബാസ്റ്റ്യന്‍ പോള്‍ ഡോക്ടറുടെ ചെയ്ത് തന്നെ! ഈ ചെയ്ത്ത് ഒരുമാതിരി ചെയ്ത്തായിപ്പോയി ഡോക്ടറേ! ഡോക്ടറും ചങ്ങലയിലെ ഒരു കണ്ണിയായിപ്പോയില്ലേ...ഇങ്ങേര്‍ക്കിതെന്തിന്റെ സൂക്കേടാണാ‍വോ? ഇനിയിപ്പോ ആരുടെ പേര് വച്ച് പരദൂഷണ മാമാങ്കം സംഘടിപ്പിക്കും! ഡോക്ടറും പിണറായിയും സൂക്ഷിച്ചോ...മാധ്യമങ്ങളെ പൊട്ടന്‍(ഇപ്പൊ അവരെന്താണെന്നൊന്നും ആരും ചോദിച്ചു കളയരുത്!) കളിപ്പിച്ചാല്‍ വിവരം അറിയും!

ഇളകിപ്പോയ കോട്ടക്കൊത്തളങ്ങളിലൊക്കെ ചങ്ങലയ്ക്ക് പകരം മതിലു തന്നെ പൊങ്ങി എന്നൊക്കെ കേട്ടാല്‍ ഏതു ഇളകാത്ത പേനയും ഒന്നിളകിപോകില്ലേ.ഏത് തുള്ളാത്ത മനവും തുള്ളി പോകില്ലേ! കേരളത്തിലെ ഇത്രം വല്യൊരു സെറ്റപ്പുള്ള പാര്‍ട്ടി ആസിയാന്‍ എന്ന ഒരു കോപ്പും പറഞ്ഞ് നാടുമൊത്തം ഇളക്കിയിട്ടും സത്യത്തിന്റെ നേര്‍മുഖങ്ങളായ ഒരു മാധ്യമങ്ങളും അതറിഞ്ഞത് പോലുമില്ല!പിതൃശൂന്യമായ” ഒരു പോസ്റ്റര്‍ കണ്ടാല്‍ പകലന്തിയോളം ചര്‍ച്ചകള്‍ സംഘടിപ്പിക്കുന്നവരുടെ നാവും കണ്ണും ഒക്കെ അടഞ്ഞുപോയി!എന്നാലും ഇങ്ങിനേം, ഇത്രേം കണ്ണുപൊട്ടന്മാരും ബധിരരും ഉള്ള നാടായിപ്പോയോ നമ്മുടേത്? “

നാട്ടിലെ കര്‍ഷകര്‍ മൊത്തം ചത്ത് മണ്ണടിഞ്ഞാലും...നിങ്ങളപ്പോഴും ചൊറിഞ്ഞോണ്ടിരിക്കണം; ചൊറിഞ്ഞു ചൊറിഞ്ഞു മടുക്കുമ്പോള്‍...എവിടെ മടുക്കാന്‍...പഠിച്ചതല്ലെ ചെയ്യാന്‍ പറ്റൂ...മക്കള് ചൊറിഞ്ഞോണ്ടിരി!